中環出更：廖偉芬開新店友得fun
廖創興家族後人廖偉芬（Jennifer）繼早前喺銅鑼灣開設首間精品咖啡店後，另一瀝血之作亦隆重登場，位於咖啡店樓上嘅旗艦店The Food Academics歐陸菜餐廳日前開張大吉，Jennifer廣邀城中好友齊開party慶祝。
Jennifer人緣好，到場祝賀嘅來賓星光熠熠，有識飲識食嘅前高官葉澍堃（Stephen）夫婦、醫院管理局主席胡定旭、富豪趙世曾公子趙式浩、香港青年聯會賢慧社幾位好姊妹羅詠詩、彭芷君、張詩培，仲有歎咖啡歎到出神入化嘅藝人陳豪都到賀，大家都盛讚餐廳好有特色。
喺大學修讀建築嘅Jennifer今趟親自操刀，一手包辦餐廳嘅室內設計同裝修，富有歐陸式氣派，牆上圖案典雅，仲有樂隊即場演奏爵士樂，整體感覺容易令人放鬆心情。Jennifer話，餐廳主題係「家的感覺」，希望客人有如置身於朋友家中一齊撐枱腳嘅溫馨感覺，而菜式亦會以歐洲地道嘅傳統家庭菜式為主。
有駐場 live band
Stephen話，最欣賞餐廳有隊Jazz live band駐場演出，事關依家唔係好多地方有樂隊演奏，品味超凡。當晚大家兩杯香檳落肚後，聽住悅耳嘅爵士音樂，兩種元素合而為一，認真魅力沒法擋，就連Stephen都情不自禁地閉上眼，哼唱幾句添！
卓妮