「朝中有人好辦事」，呢句說話永遠都唔會過時。港產官僚圍威喂，互相包庇，互相照應，連執法都可以打折扣，連僭建物都可以拖而不拆，問你服未！
前政務司司長唐英年同前食物及衞生局局長周一嶽早前雙雙捲入僭建醜聞，一個僭建二千四百幾呎嘅「地下王宮」，一個將豪宅露台用玻璃板完全圍封，兩單醜聞都曾引起社會議論紛紛。開講有話，王子犯法與庶民同罪，高官僭建被人踢爆，照計應該第一時間清拆嘅喇，點知事實啱啱相反，兩個僭建物分別拖咗九個月及半年，到依家仲係原封不動，你話奇唔奇吖。
其實咁又難怪嘅，前特首曾蔭權爵士位於半山嘅「祖屋」亦被踢爆露台有僭建物，都係拖咗好耐至肯清拆，佢其身不正咯喎，下屬仲唔有樣學樣咩。「曾朋友僭建黨」蛇鼠一窩，既然有人照住，咪拖得就拖囉。
兩單前朝高官僭建個案久拖未拆，當局執法虎頭蛇尾，屋宇署又點解釋呢？佢哋話喎，業主已經委任專業人士提交補救工程建議書，署方會繼續同業主及委任嘅專業人士跟進。簡直九唔搭八，一單跟進咗九個月，一單跟進咗半年，究竟仲要跟進到幾時吖？
正如學者話齋，當局對升斗市民「咬住唔放」，對前朝高官就「畀足面」，導致唐英年同周一嶽僭建事件拖咗幾個月都未處理，好明顯係雙重標準，選擇性執法。以周一嶽露台嘅僭建物嚟講，如果有心清拆，幾日就搞掂喇，拖到依家仲未有下文，分明想「博大霧」啫。
好嘞，市民又點睇呢？「東方報業民意調查」顯示，周一嶽五月被揭發僭建，至今仍未清拆，兩成受訪者直斥佢存僥倖之心博大霧，兩成一指佢搵藉口拖延，四成一人認為屋宇署跟進不力。而對於唐英年嘅「地下王宮」，近兩成受訪者認為佢「話拆唔拆」誠信破產，三成七指處理程序太慢欠公信力，三成人更直指屋宇署有包庇前朝高官之嫌。
仲有吖，廉政公署當時高調介入唐英年僭建事件，至今仍毫無進展，咁又點解吖？上述調查顯示，四成二受訪者認為廉署應盡快交代調查結果，一成七直指廉署雷聲大雨點小，兩成八甚至認為最後又係不了了之。
嗱，公道自在人心，當局官官相護，選擇性執法，始終逃不過市民雪亮嘅眼睛。咪話功夫茶唔提醒吖，人在做，天在看，依家香港已經夠亂嘅喇，如果港產官僚繼續玩包庇，遲早引火自焚，連你哋嘅招牌都被人拆走嘅咋！