睇見枱頭上的日曆瘦剩一棚骨，歲暮感懷，愁見香港回歸十五年來，不但未能政通人和，而係行政立法兩相纏鬥不休，政客搞風搞雨，CY因僭建陷誠信危機，施政寸步難行，「適度有為」變「高度被困」，老朽忽地想起聶紺弩嘅「鋤草詩」：「何處有苗無有草，每回鋤草總傷苗。培苗常恨草相混，鋤草又憐苗太嬌。未見新苗高一尺，來鋤雜草已三遭。停鋤不覺手揮汗，物理難通心自焦。」香港如今萬事憂，高官無能，政客無良，黨棍無恥。講真，個個薪高糧準，可是，真正為市民服務嘅、真正做實事嘅又有幾多個？立法會議事堂烏煙瘴氣，不議事只拉布，有瞓到口水直流三千尺者，有雙重娛樂者，既拉布又睇波，有夾埋兩三位知己，當主席冇到，邊嬉戲邊笑談……呢啲咁筍嘅工，睇怕淨係香港至有！