政情：劉夢熊教CY「宜粗不宜細」
冇見一排嘅全國政協委員劉夢熊尋日現身旺角一個街頭論壇，不忘大師上身，一方面慨嘆特首梁振英（CY）就僭建風波發出嘅聲明，洋洋萬字太囉囌，一方面又以過來人身份，批評中央政策組首席顧問邵善波近日嘅惹火言論唔夠政治成熟。咁佢對邵善波個位有冇興趣？劉夢熊即時耍手擰頭，話要佢坐呢個位簡直「大才小用」咁話！
劉夢熊向來係CY嘅忠實支持者，但提起佢就僭建風波發表嘅書面聲明，都不禁要贈佢兩句，話回應「宜粗不宜細」，與其寫萬二字解釋，不如直截了當以五句說話了結事件，就係認錯、道歉、承諾吸取教訓兼委託認可人士再作全面檢查，並以放低僭建包袱，專注搞好民生作結，咁泛民就冇得再上綱上線，件事就可以告一段落喇！
指點中策組
提起邵善波上任後動作多多，更聲言要「參與輿論戰」惹嚟好大回響，曾任中策組非全職顧問嘅劉夢熊亦忍唔住要指點迷津，話「有啲嘢可以講唔可以做，有啲嘢可以做唔可以講」，邵用到「戰爭」字眼，即係視輿論為敵人，會影響中策組喺市民心目中嘅中立性。其實如果事事都咁簡單，政府就唔會畀人叫做熱廚房喇。