中環出更：姚祖輝報名選人大
第十二屆港區人大選舉提名期明日結束，而選舉投票日亦會喺兩星期後舉行。卓妮尋日喺馬場碰見曾任香港青年聯會主席嘅中華全國青年聯合會常委姚祖輝（Andrew），佢話佢上星期五已經報咗名參選，正努力拉票，又話今次參選，同全國青聯副主席陳仲尼（Rock）或取消參選無關。
否認頂替陳仲尼
有傳言話身兼考試及評核局主席嘅Rock或打退堂鼓唔參選，由Andrew頂上呢個位置，因為兩個人都有青聯嘅背景。成個人清減咗嘅Andrew就話，自己參選同Rock無關。佢仲笑言，自己已經喺香港做咗多年青年工作，所以今次想將青年人嘅聲音帶入國家喎。至於勝算，佢就話有信心。
姚祖輝除做咗多年嘅青年工作，八年前仲攞過青年工業家獎。佢喺哈佛商學研究院畢業，做萬順昌集團主席兼行政總裁時，萬順昌十年間由以香港為基地嘅鋼鐵貿易公司一躍成為以中國市場為主嘅工業鋼材服務供應商，員工人數由五十人增至千二人，營業額更加由每年的五百萬港元，攀升至三十五億港元，因此佢對內地的情況，都好熟悉。