中環出更:林建康 陳正欣齊拉頭馬

毛毛雨籠罩沙田馬場,馬迷無乜Mood賭馬,相反一班城中名人就熱鬧到極,紛紛冒雨入場為愛駒打氣,結果愛沙尼亞駐港名譽領事林建康(Matthew)及保良總理陳正欣(Daniel)獲財星高照,雙雙拉頭馬。

Matthew匹團體馬「千軍萬馬」,賽前狀態大勇,佢拉埋一眾老友入場,顯然信心十足。果然「千軍萬馬」喺第四場一支箭直奔終點,力壓金至尊珠寶主席黃英豪嘅愛駒「香港至尊」,Matthew同老友振臂高呼。梗係喇,頭馬獎金高達近四十萬元,好和味。咁Lucky,Matthew變身「黃大仙」,笑言會送聖誕厚禮畀太太及一對乖仔,「鍾意乜就買乜」,金額無上限。自己呢?就獎勵一個旅行Trip,聖誕將與媽咪及家人遊獅城,大擦豐富美食。

黃英豪輸馬贏風度

講番英豪哥,雖然輸咗馬,見到老友Matthew,仍然禮貌地握手合照,認真有風度。查實匹馬跑第二都有逾十五萬元獎金,英豪哥話,會請晒家人遊泰國,過一個熱辣辣聖誕。數幸運兒,仲有一位。佢就係金至尊數碼行政總裁吳傑莊(Johnny),佢貼中Matthew同英豪隻馬,落注數百,結果贏咗近萬元,一於買個手袋氹太太開心喎。

Daniel馬運一樣咁旺,佢有份嘅團體馬「金獅猛將」奪冠,獎金都係近四十萬元。咁點慶祝呢?本身係瑞士名錶IWC中國同香港代理嘅Daniel話臨近聖誕比較忙,無暇出門。但點忙都會同家人食聖誕大餐,狂歡一夜。

尋日盃賽由香港大酒店贊助,由集團主席米高嘉道理夫人頒盃,嘉道理都有出席,佢哋嘅交通工具係直升機,認真有派頭。

卓妮

第一手消息請下載on.cc東方互動iPhone/iPad/Android/Windows Phone Apps