私院係簡稱，全稱係乜嘢東東？如果你話答案係私家醫院，恭喜你，你係一個正常人；如果你話答案係私心醫院，更加恭喜你，你係一個關心時事嘅正常人。
私院嘅全稱之所以係私心醫院，無他嘅，佢哋嘅所作所為有時候有違公德，無私顯見私咁解囉。譬如咁講吖，政府批地畀地產商興建仁安醫院，結果醫院用咗一半土地，另一半土地居然丟空二十年之後變咗財源滾滾來嘅豪宅，你話係咪私心太重吖？當然啦，如果唔係政府監管不力，私家醫院都冇辦法成為私心醫院嘅，難怪審計署批評，政府當初批出嘅土地過大，導致發展偏離原意。
除咗建院土地變豪宅之外，私心醫院有違公德嘅事例仲有唔少o架，好似原意用作非牟利長者中心嘅面積改建頭等病房賺大錢，應承提供免費或廉價病床又冇兌現等等。更加離譜嘅係，私院一旦出現害人不淺嘅醫療事故，往往以私隱作為藉口秘而不宣，嚴重剝奪市民知情權。
東方報業民意調查顯示，對於私院偏離原意將土地發展為豪宅項目，四成受訪者認為廉署應該跟進，查一查有冇涉及官商勾結；三成一批評當局安排失當影響醫療發展；一成九直斥政府浪費土地資源。
嘩嘩嘩！一講到官商勾結，難免令人發思古之幽情，想起兩位已經係過去式嘅歷史人物，一個係食衞局前局長周一嶽，一個係衞生署前署長林秉恩。功夫茶之所以緬懷舊事，無非因為過去幾年喺呢兩位大老爺掌政之下，私院嘅表現愈來愈見太重嘅私心。如果廉署真係要查一查，麻煩邀請周一嶽同林秉恩重臨人世，交代一下私院混帳嘅來龍去脈。
至於政府免地價或以象徵式租金批出土地，加入私院必須提供免費或廉價病床條款，但部分私院違反承諾，衞生署又冇查證，四成八受訪者批評政府縱容私院，情況猶如無王管；兩成五認為當局冇適時調整監察模式；兩成二覺得偏離規定未能造福港人。
計功夫茶話齋，官場老爺奶奶嘅所謂監管，根本就係「監生不管」，否則冇可能發生嚴重醫療事故之後，竟然隻眼開隻眼閉，任由私院遲遲都唔通報。關於衞生署放生私院，四成四受訪者認為必須檢討規管架構；兩成七覺得冇阻嚇就無法改善違規行為；兩成四批評呈報系統未能有效執行。
其他調查數據都唔講嘞，如果大家想知道私院點先至可以減輕私心，其實可以從一個角度諗一諗：邊個監管失職，邊個人頭落地。如果問責制貫徹執行而唔係掛羊頭賣狗肉，私院想私心都難！