唔少富二代都喜好杯中物，有時應酬幾杯落肚在所難免，但唔飲得又要扯到盡出醜嘅就自己攞嚟衰。我哋就八到有個鍾意蒲夜場嘅富二代，姑隱其名叫佢做「三花雞」，幾乎逢飲必醉，曾經試過飲醉咗之後，企喺自己架私家車頂不停大聲叫自己個名，又拎咗自己疊卡片出嚟亂撒滿一地，大叫「我係×××，依家出嚟參選，請大家支持我！」
呢位「三花雞」仲試過有一次同成班朋友去唱Ｋ，人哋唱歌佢就係咁劈酒，結果飲到啤啤夫失晒常性，竟然隨手用雜物亂掟一通，仲搞到掟爛咗Ｋ房入面個LCD大電視添！部電視大嗱嗱成四萬幾蚊，咁就毀於一旦，搞到人哋間房第二日做唔到生意。「三花雞」就話錢多啫，但個掃地阿嬸就無辜喇，無啦啦多撻瘌，要執手尾掃餐懵，認真好帶挈。