政情：女中醫馮玖短訊拉票選人大
三十六名港區全國人大代表換屆選舉快將接受報名，各疑似候選人陸續浮上水面，最新曝光嘅係香港註冊中醫學會會長馮玖，佢上周初突向部分選舉團成員發出短訊，自爆喺中醫同業及好友支持鼓勵下，計劃參加人大選舉，希望得到大家支持同埋提名，究竟馮玖最終能否突圍，可能就要從提高知名度入手。
事實上，馮玖喺業界江湖地位十足，好似喺去年特首選舉委員會中醫界別，馮玖以超過一千三百票當選「票后」，而且仲係少有嘅業界代表無提名任何一名特首參選人，另外佢最近又獲政府重用，獲委任為中醫藥發展委員會籌備小組成員。
不過有政界中人話，馮玖要參選睇怕最急須要提升知名度，因為據聞有部分人淨係睇佢個名，都分唔到究竟佢係男係女，所以索性叫佢「馮醫師」避免出錯，到底點樣將業界江湖地位轉化為知名度，相信呢個係馮玖首要考究嘅課題。