政情：嫻姐練氣功黑面都可變笑面
立法會「開學」後第一槍，就係長者生活津貼。工聯會陳婉嫻講親長津都扯火，堅持要撤去資產審查。原來嫻姐有練氣功調整心情，就算喺立法會開會都偷空去練，唔怪得佢最近無咁火滾喇。
就長津撥款，財委會上星期五至拉布拉咗幾粒鐘，嫻姐就話佢喺開會期間，有時都會趁休息偷偷地上十樓寫字樓練氣功。佢話佢練氣功站立，雙手扮捧碗，最緊要係乜都唔諗，同埋最忌心浮氣躁。佢每次練氣功十至十五分鐘，仲話練完後無論原本心情幾差都可以笑番，咁就可以不再以黑面示人。
嫻姐幾年前因患乳癌做過手術後，一直都保持做運動嘅習慣，最鍾意係行山，亦有搵私人教練教佢健身，依家練埋氣功，個人唔知會唔會心平氣和啲呢？大家都見到佢尋日就算講到長津撥款，都無咁扯火喇。另外佢尋日出席一個活動，大玩呼拉圈，跑嚟跑去都唔覺佢喘氣，睇嚟活力十足。