近排是非不斷嘅女童軍會今日開周年大會，唔少女童軍「大姐大」都會出席。今次會議前，一度發生競逐副會長小風波，有人指女童軍香港總監彭徐美雲要求「升呢」做副會長，引來會中人竊竊私語，質疑佢未做完總監，又要掛多個銜頭，彭太最後順應民意，自動退選。不過據聞有七位名譽副會長將順利「升呢」。
佢哋就係玩具大王蔡志明太太蔡李惠莉、中總會長蔡冠深太太蔡關穎琴、莎莎國際主席郭少明太太郭羅桂珍、富豪邱德根新抱邱吳惠平、四洲集團主席戴德豐太太戴胡美蓉、著名兒科醫生陳曦齡，仲有耳鼻喉專科醫生王賜豪添。經周年大會拍板後，呢七位副會長就正式誕生。
聽聞名譽副會長名單上，都有新面孔加入，包括前仁濟主席李文斌太太李何芷韻等。個個有頭有面。
陣容咁鼎盛，相信嚟緊女童軍一定有一番作為喇。