政情：電視台專拖Greg蘇後腳
反對派早前玩完教育局局長吳克儉同發展局局長陳茂波，最近開始將槍頭轉向商務及經濟發展局局長蘇錦樑（Greg蘇），包括批評佢唔肯介入香港數碼廣播電台風波、翻炒佢嘅寓所僭建事件、以至炮轟佢遲遲唔肯批出更多免費電視牌照等，但唯一煲得起嘅只有免費電視發牌問題，事關亞洲電視場「世紀爛騷」搞到愈煲愈熱。查實Greg蘇每次碰到有關電視台嘅問題，都遇到波折同阻滯，莫非佢同電視台嘅八字唔夾？
早前亞視直播以亞洲會名義舉辦嘅反發牌集會，除咗引發上千市民向通訊事務管理局投訴外，仲連累Greg蘇取消外訪，認真無辜。話說Greg蘇原定喺本月底出訪法國，出席一個推廣香港紅酒業嘅活動，並順道向當地商界推介來港投資，但咁啱有泛民議員抽中喺本月廿八日嘅立法會大會上，就亞視「爛騷」同免費電視發牌問題提出動議。由於今次係新一屆立法會首項針對商務局嘅議案，為免被議員質疑佢唔尊重議會，Greg蘇惟有放棄外訪。
上次險缺席女兒婚禮
其實Greg蘇上次處理倫敦奧運轉播權風波，亦同樣遇到阻滯。當時有收費電視台以高價買咗奧運嘅主要轉播權，同其他免費及收費電視台就分享轉播權問題傾唔掂數，連累全港大部分電視觀眾可能冇得睇奧運，多個政黨都要求政府介入調停。最後Greg蘇搵咗幾間電視台嘅高層秘密談判，仲講到明要喺當晚九點四十五分之前傾掂數，否則就會宣布談判破裂。
點解要訂九點四十五分做死線呢？原來Greg蘇晨早就請晒假訂好機票，喺當晚坐夜機趕往英國，出席佢愛女嘅婚禮。最後佢呢招果然奏效，各方啱啱好喺死線前嘅最後一分鐘達成協議，令全港市民都可以免費睇奧運，Greg蘇亦趕得切上機見證女兒嘅人生大事，兩全其美，唔知今次免費電視發牌風波，能否同樣有個圓滿收場呢？
講開又講，Greg蘇最近一年來真係喜事重重，今年三月囝囝娶老婆，暑假就嫁女，據聞明年初仲會有孫抱添，五十頭就榮升做阿爺，人生至此，民望是起是跌都無乜所謂囉！