中環出更：陳鄭玉而心得 傳統蒸氣熨斗好
熨斗係家家戶戶必備嘅電器之一，但花多眼亂唔知點揀好。做熨斗起家嘅仁愛堂副主席、東保集團創辦人兼行政總裁陳鄭玉而（Connie）話，依家啲熨斗講到天花龍鳳，其實最終都係傳統嘅蒸氣電熨斗最好，唔一定要買好貴，蒸氣量大就夠喇。Connie明年將接任仁愛堂主席，佢話依家已經忙住同現屆主席黃達東溝通，為接棒做好準備，至於盤生意，佢笑言有老公陳鑑光睇住，非常放心。
尋日Connie同另一位副主席李愛平現身沙田馬場，齊為前仁愛堂主席蔡黃玲玲及丈夫蔡金山嘅愛駒「智高星」打氣，雖然靚駒最後跑第三，但有近11萬獎金落袋，大家都笑得好開懷。Connie公司以生產熨斗、咖啡機、電蒸籠等小型家電為主，今年歐美經濟差，公司營業額反升近一成，皆因市民消費意欲低，多咗喺屋企煮飯煲咖啡，帶挈廚房電器大賣。
黃家恒放假甜蜜蜜
卓妮又遇到九龍表行第三代傳人黃家恒（Kevin）同女友高潔拍住拖入馬場，Kevin話近日忙於籌備表行周年活動，忙到依家至有假放。佢透露伯父黃錦成明年初將會出書，做埋記者走訪各行各業嘅精英，講吓佢哋嘅生意經。同場有新界鄉議局主席劉皇發公子劉業強，佢同愛沙尼亞共和國駐港名譽領事林建康及一班老友共同擁有嘅駿駒「精彩日子」勝出馬會一哩錦標賽，瓜分一百七十一萬元獎金，認真和味。中建企業董事許晉亨尋日戙住拐杖單拖現身，似係左腳受傷，但佢冇開腔回應傷勢。
卓妮