有賊就要捉，有火就要救，應該係人盡皆知嘅常識喇啩。偏偏香港係一個相當奇怪嘅國際大都會，手握指揮棒嘅權貴階級往往後知後覺甚至不知不覺，一次又一次「賊過興兵」不特止，間唔中仲要玩一玩「火熄響鐘」。
賊過興兵容易理解吖，賊佬逃去無蹤先至有大頭兵出現囉，何謂火熄響鐘呢？件事係咁嘅，機場輸送帶有一個行李篋失驚無神自焚噴火，另一個行李篋飽受池魚之殃，消防員接報到場動用滅火筒處理，半小時之後將兩個篋嘅火勢撲熄。就喺呢一個化險為夷嘅時候，機場警鐘先至施施然響起，你話係咪有病吖？
賊過興兵同火熄響鐘嘅後果都可大可小o架，好似旺角鏹魔至今仍逍遙法外咁吖，你真係唔知幾時一樽鏹水照頭淋。至於火熄響鐘咯喎，喂，既然警鐘遲遲都冇響，即係話火燭期間冇疏散啦，容乜易星火燎原機場員工變燒豬o架！
其中一名機場員工就話嘞，事發時有超過一百人正在工作，包括行李處理員以及清潔員等等，現場雖然煙霧瀰漫，但係機場管理局竟然冇採取疏散措施，員工繼續喺煙霧之中工作。員工懷疑機管局為咗確保航班正常起飛，所以冇因為行李噴火而安排疏散，實在係罔顧人命安全。
機管局發言人仲要死撐喎，表示事發時煙霧感應器立即啟動，職員及外判行李處理承辦商職員即時用滅火筒撲救，消防員到場再用滅火筒將火救熄，因為火警好快撲熄，所以冇疏散員工。如果咁嘅解釋可以接受，全香港以後唔使再叫人走火警啦，傻更更等運到囉，甚至連警鐘都唔使響，反正疏散已經變得冇意義。
所以話啫，手握指揮棒嘅權貴階級真係好鬼死疏懶o架，救急扶危嘅指定動作永遠做到荒腔走板。一個機管局係咁，一個醫管局更加係咁，如果唔係疏懶成性，點樣解釋醫療事故多到嚇死人呢？
機場行李處理區上個月都發生過嚴重事故，一名外判清潔男工慘遭行李車撞倒輾過，必須切除左腳小腿保命。工業傷亡權益會總幹事陳錦康就批評嘞，機管局冇為員工提供一個安全工作環境，發生火警冇即時疏散員工，警鐘又冇及時響起，絕對不能接受。陳錦康仲話，最近接獲多宗發生喺機場嘅工傷個案，認為機管局有必要全面檢討安全設施。
功夫茶講多次，有賊就要捉，有火就要救，撲救火災嘅全套服務係包括疏散群眾o架。如果咁嘅常識都唔曉，唔該權貴階級交出指揮棒退位讓賢，無謂尸位素餐有損市容啦！