爭取新界村屋僭建合法化工作關注組發言人、屯門鄉事委員會主席何君堯，一直致力爭取新界村屋僭建合法化，佢仲呼籲村民集體杯葛村屋僭建物申報計劃。我哋收到鄉紳報料，話何君堯打算喺十一月十一日星期日發動大遊行抗議，有原居民仲形容何君堯係「新界洪秀全」，話佢熱心維護新界人權益咁話。
該鄉紳話，大家當日下晝三點鐘會喺元朗賽馬會廣場集合，抗議政府要拆僭建盡毀原居民家園。佢仲話，到時何君堯會行頭帶隊，示威者亦都會高舉代表港英時代嘅旗幟，抗議政府以前對新界人非常尊重，但依家竟然搵佢哋開刀，搞到原居民權益變得面目全非。我哋打過電話畀何君堯想問吓佢係咪真係帶隊遊行，但喺截稿前未有回覆。
報料嘅鄉紳仲話，依家唔少村民當正何君堯係英雄，於是夾手夾腳封咗個代號畀佢，話佢今日嘅行動可以媲美當年對抗滿清政府管治嘅太平天國領袖洪秀全，希望佢可以不負眾望喎。