政情：莊偉茵過檔 即變慳電師奶
前國泰航空高層莊偉茵（Quince）自從過檔擔任中電企業發展總裁一職後，節能意識都高咗。雖然中電有員工電費津貼福利，但為咗環保，Quince屋企冷氣都開少咗，寧願走去買幾把慳電風扇。Quince日前拖實老公黃楚權出席理大慈善晚宴，講起新工作，佢自嘲係新丁，既要巡視發電廠，又要了解供電系統，變咗「每事問」，所以仲忙過以前，幸好一班同事日日同佢上「雞精班」。
Quince呢位大公關能手，轉工後不忘為新老闆賣廣告，笑言自己變咗「慳電師奶」，用電時亦會諗過度過，平時歎慣冷氣，依家寧願多吹風扇。唔單止咁，就連佢嘅「廚神」老公都受感染，減少用煤氣爐，改用電磁爐同光波爐，計落慳番唔少電喎。成日有老公明火靚湯滋潤，難怪Quince有電力繼續搏殺喇。