政情：聞貪曾飯局 查史美倫唔耐煩
本報前晚發現「貪曾」曾蔭權、鄉議局主席劉皇發及行政會議成員查史美倫（Laura）與夫婿等人，前後腳離開灣仔會展皇朝會，疑似係搞飯局。咁啱我哋尋日下晝四點鐘又喺中環太子大廈遇到Laura行書店，於是問佢前晚係咪同貪曾一齊食飯？佢冇直接承認，但指同場仲有好多人嘅，話只係純粹食飯傾吓偈喎。
政圈內一直流傳Laura同貪曾唔啱Key，Laura就話：「傳之嘛，出面仲有好多嘢傳o架啦！」仲反問我哋出面啲人仲流傳啲乜嘢，叫我哋講番畀佢聽喎。咁究竟佢同貪曾係唔係朋友呢？Laura就好似有啲唔耐煩咁回應話：「係呀係呀！……」
話說Laura行書店期間，被放喺近門口一本名為《100 PLACES YOU WILL NEVER VISIT》嘅書吸引住，於是戴上眼鏡認真咁慢慢睇，停留咗十五分鐘先離開。Laura話，夜晚有個會議要開，見有少少空檔，咪周圍行吓囉；跟住佢就走到附近一間酒店歎下午茶，認真寫意。