政情：肥亨賣樓「神」來之筆
所有嘢都靜待「神」安排嘅前商務及經濟發展局局長馬時亨（肥亨），最近又獲「神」眷顧，成功出售已居住十六年港島中半山澄碧閣嘅單位，勁賺五千多萬元。近日有傳肥亨夫婦將旗下公司名義持有嘅澄碧閣二樓單位，以董事轉名方式轉讓畀上市公司莊士集團高層，以接近九千萬元成交，同佢喺九六年以三千二百八十萬元購入價計算，勁賺五千多萬元！
我哋明查暗訪下，發現肥亨確實喺十月初透過公司轉名方式將其單位成功出售，至今連錢都收埋。至於點解會賣畀莊士集團呢？據聞原來係「神」嘅安排。話說肥亨喺數月前一個飯局上巧遇莊士集團主席莊紹綏（Alan），Alan就喺席間問起肥亨知否澄碧閣有物業以八千多萬元成交，仲話有興趣買番個單位添。肥亨聽見Alan咁講，於是問Alan有冇興趣買佢個單位，事後更安排對方去睇樓，結果睇咗半個鐘就成交，就咁促成呢單買賣。
套現用利息交租
據聞肥亨想將居住單位放盤已有一段時間，但其太太王培琪一直好反對透過地產經紀賣樓，事關唔想好多街外人喺屋企出出入入睇樓，難得今次毋須透過經紀賣樓，而且價錢又高過市價，於是扑錘出售。雖然呢單買賣成交咗，但據聞肥亨近月工作好忙，所以獲Alan通融畀佢住多幾個月先遷出，同時方便佢喺中半山物色租住單位。中半山樓盤租金都唔平，但據聞肥亨已打好如意算盤，就係將賣樓嗰九千萬元利息用嚟交租。
其實肥亨個大女露明已出嫁，據聞佢兩夫婦同細女露玲都唔使住到三千三百呎咁大地方，所以嚟緊租樓都只會物色面積較細嘅單位居住，收息交租好划算。我哋問番肥亨呢單賣樓消息，佢只係話莊士集團係上市公司，所以佢唔方便透露咁多交易詳情，但強調現階段仍然住喺澄碧閣，之後就唔知喇。
至於肥亨將旗下公司轉名售予莊士集團後，據聞公司董事新增咗該集團嘅董事總經理高上智、執行董事莊家彬及莊家蕙。家彬同家蕙係Alan嘅仔女，今次買落肥亨個單位，究竟係純粹睇好樓市前景而投資吖，定係預早為仔女將來成家立室做好準備呢？