廉署就話有必要保密啫，而且保得密密實實，之但係警務處嘅作風點解愈來愈秘而不宣嘅呢？好似外號「禿鷹」嘅警務處處長曾偉雄咁吖，今年八月訪問北京，事前居然粒聲唔出，傳媒統統蒙在鼓裏。你知啦，香港高官北上朝聖好敏感o架，尤其係負責本地維穩工作嘅一哥，拜會槍桿子裏出政權嘅領導人，唔聲唔聲真係會嚇人一驚，點知你會唔會將中國城管同公安嗰一種野蠻執法直接引入o架。
更加秘而不宣嘅係平時嘅消息發放，簡直係「熄機」嘅黑箱作業。警方○四年起逐步以第三代通訊系統替代無線電通訊系統，令傳媒無法再透過「聽機」獲取突發消息。有新聞團體曾經做過統計，警方○九年下半年，每日發放突發消息平均只得二點七宗，只係當年警方接獲罪案宗數百分之一點二七，其中唔少日子仲係「零發布」添。
嗰一套第三代通訊系統即係密不透風嘅黑箱啦，本來作用係防止走漏風聲，剝削公眾知情權，不過害人終害己。耗資近五億元公帑引入嘅第三代通訊系統前日早上十一點左右故障，主要導致港島總區指揮及控制中心部分電台未能與前線警務人員通訊，必須轉用警察流動無線電話保持通訊。雖然當局立即搶修，但手忙腳亂擾擾攘攘十七粒鐘之後，先至喺昨日凌晨四時回復正常。通訊陷入黑暗狀態嘅時候，警方照例玩神秘，事發十二小時先至對外公布系統故障。
呢嗱嗱嗱，你話係咪害人終害己吖？嚴格而言係瞞人終瞞己。情況就好比一隻警犬，忽然之間有一個黑箱由頭笠到落腳，眼又睇唔到，耳又聽唔到，最重要嘅係連個鼻都聞唔到，警犬即係被廢武功囉，神犬拉西都要打柴啦！
香港警察變咗秘密警察，黑箱作業阻礙消息發放，等於嚴重剝奪新聞自由，咁就難怪市民唔滿意嘞。港大民意研究計劃最新調查發現，市民對香港新聞自由滿意率由上次百分之六十九，大幅下滑十五個百分點至百分之五十四，不滿率由百分之十四增至百分之二十四，此消彼長之下滿意率淨值由百分之五十五跌至百分之三十。香港嘅新聞自由除咗令市民不滿之外，同外國比較又點睇呢？「無國界記者」早前列出一一至一二年度全球新聞自由指數排名，香港排名急降二十位至第五十四。
好心秘密警察唔好咁鬼祟啦，箝制新聞自由隨時害死人o架。舊年十月初將軍澳出現「口罩刀客」，兩日連環刺傷四人，警方一個星期之後先至公布案情，街坊毫無心理準備，慘遭刺傷甚至刺死都唔知發生乜嘢事！
總之一句講晒，還我新聞自由！