政情：原定訪日講保釣 長毛夢成空
長者生活津貼撥款一拖再拖，除咗搞到全港四十萬長者隨時少收一個月津貼，連未到六十五歲嘅社民連主席梁國雄（長毛）都被拖累，原來佢獲邀到日本講釣魚島問題，原定今日財委會投完票就上機，但依家可能押後到下周二至投票，佢惟有急急腳取消行程。
成日周遊列國嘅長毛，原來成世仔都未去過日本，早前佢獲某日本傳媒邀請，去大阪一間大學發表演說，講中日最關注嘅釣魚島問題，佢當然立即答應，一來難得有日本人欣賞佢，唔怕佢言論偏激，二來係佢自從做咗社民連主席後，又要搞黨務，又要搞選舉，已有一段時間無去旅行，因此密謀喺演講前可以偷一日暢遊日本，依家卻好夢成空。
唔知係咪為咗發洩不滿，長毛尋日喺福利事務委員會上，炮轟勞工及福利局局長張建宗教長者將資產轉移畀子女，叫出名係高官樓王嘅張建宗過晒啲錢畀佢，佢每月再畀番多少生活費對方過活。有建制派隨即問長毛係咪想認張建宗做老竇，長毛即反駁：「我係認賊作父！」轉數真快。