政情：林鄭陳茂波狂買有機食品
政務司司長林鄭月娥聯同發展局局長陳茂波（Paul），尋日孖咇出席觀塘駿業街遊樂場嘅藝術加綠色生活活動啟動儀式，兩位高官平時唔知係咪工作太忙冇機會買嘢，見到現場嘅有機農墟即刻開心到雙眼發光，滿場飛不斷買嘢，結果兩人各用咗三百二十二元同三百五十七元買有機產品，滿載而歸。
林鄭買嘅有機產品中，最貴係冬瓜，要成百元一個。不過，最特別嘅係，曾做過發展局局長嘅林太，一見到大棠荔枝園個招牌，即時就衝埋去買有機芽菜。大家應該記得，大棠荔枝園其中一個老闆係十八鄉鄉事委員會主席梁福元，林鄭過去同佢因為僭建問題爭拗多多，但尋日仍然畀面幫襯，相當識做。
至於阿Paul同樣有掃貨，買得最貴嘅都係冬瓜，要一百二十九元，最平嘅係十字架小飾物，盛惠十八元，啱晒佢嘅基督徒身份。呢項活動每逢周四舉行，正午十二時開到下午七時，直至明年一月十日完結。尋日林鄭又宣布，位於觀塘繞道天橋底嘅文化表演場地明年一月開幕，場地用廢置油罐作圍欄，可以話相當有特色。