政情：港區人大 預埋李少光
歷任保安局局長都深得中央信任，幾乎離任後都有新發展，最新途徑係走入服務國家之路。消息指，有關方面對前保安局局長「情有獨鍾」，曾游說過新任行政會議成員葉劉淑儀參選港區全國人大代表，但對方最後無應承，反而剛喺六月底離任、現年六十四歲嘅李少光（光哥）對參選躍躍欲試，倘光哥順利當選勢必成為中港溝通新橋樑，日後喺政圈角色吃重嘅程度只會有增無減。
港區人大代表選舉初定於十二月下旬舉行，據聞現屆港區人大三十六人中，有約十人會退下火線，包括團長袁武、副團長吳清輝、新界社團聯會代表羅叔清、九龍社團聯會代表高寶齡等，最近政圈陸續傳出有意參選嘅名單，更有政治耳語話連同角逐連任嘅廿多名人大代表，可能多達六十至七十人報名參選，最新消息更傳出會有具分量嘅前高官參選，講緊嘅原來係做過九年問責官員嘅光哥。
傳參選頻出席政圈活動
消息指，從事政府工作三十八年多嘅光哥，為官期間一向畀人「三高」印象，即高民望、高人氣同高能力，加上佢與不同政見嘅人都有傾有講。最近有政界中人爆料，話光哥近期好活躍，頻頻出席酒會活動同各界人士打交道，好似前港澳辦副主任陳佐洱新書發布會、中華總商會十‧一酒會等都見到佢身影，同一眾退休後近乎絕迹政圈嘅前高官成強烈對比。
另有心水清嘅政界中人則指，其實光哥離任前接受傳媒訪問時，曾有所暗示日後會有新發展，當時光哥話，自己離任後好樂意「以唔係做官嘅身份」繼續服務香港、服務國家，估不到事隔只有四個多月，光哥就被積極游說參選人大，似乎冥冥之中自有主宰。
事實上，光哥已非首名前高官有意轉戰人大，還記得○八年時，前廉政專員羅范椒芬獲當局批准喺離職前休假期間參選人大，最後得到各方支持並順利當選，唔知同樣做過廉政專員嘅光哥，參選前會否向羅太取吓經呢？