中環出更：音樂會推廣敦煌文化
垂誼樂社藝術總監、著名大提琴家李垂誼，今晚會喺中環大會堂音樂廳舉行一場以敦煌為主題嘅音樂會，作為世界首演。樂社理事會成員紀文鳳（Leonie）出席音樂會宣傳活動時話，敦煌嘅光輝歲月跟繁華璀璨嘅香港有如前世今生，值得大家好好研究，並且希望藉着音樂，將充滿異域風情嘅敦煌文化對外推廣，令到世人都認識中華文明嘅內涵係何等豐厚。
港作世界首演
身兼香港敦煌之友副會長嘅Leonie，對敦煌文化相當熱衷。佢話唐朝係敦煌嘅全盛時期，民風較為開放，女權較高且衣着十分時髦，而城內最多人擔任嘅工作係譯語人，由此可見位處絲路要塞嘅敦煌薈萃各方商旅，同今日香港呢個國際都會真係不遑多讓。
Leonie話，為咗籌備今次音樂會，除咗邀請慕尼黑室樂團來港演出，仲有幸得到著名美籍華人作曲家盛宗亮為音樂會譜寫新曲，而盛宗亮亦曾往敦煌走一趟，以吸收創作靈感。至於負責大提琴演繹嘅李垂誼（Trey）就話，新曲充滿中亞地區嘅音樂元素，相信觀眾欣賞過後會對敦煌留下印象，而香港首演之後將會到上海及北京，並準備明年往歐洲演出，希望引起世人注視敦煌文化。