中環出更：名人大談 西藏遊記
充滿異族情調嘅西藏，魅力無限，日前尖沙咀文化中心舉行咗一個西藏攝影展，城中名人齊去一睹鏡頭下嘅西藏風光。有到場湊熱鬧嘅新鴻基地產非執董郭炳湘話，好欣賞西藏風光，但對上一次入藏已係八至十年前嘅事了。卓妮順便問佢嘅母親郭老太身體近況如何，佢連聲答話：「好好！好好！」
食物及衞生局局長高永文都去過西藏，多年前曾經與一班眼科醫生前往，幫當地白內障患者做手術，最難忘係當時行川藏公路嘅國道三一八線入藏，沿途翻越多座險峻高山，隨着公路蜿蜒攀升，車外景色亦變化萬千，有熱帶森林、草原、峽谷及寒冷氣候下嘅雪山，十分壯觀，至今諗起依然回味無窮。
對於李嘉誠基金會董事洪小蓮擔心去西藏有高山反應，高永文一聽到就拍心口話，下次同佢一齊去就唔怕喇，事關佢會帶齊所有西藥去，「不過，要等我落咗台先！」高官講「落台」認真大吉利是。咁又係嘅，高永文加入政府後，日日忙到冇覺好瞓，邊有時間去遊山玩水吖！
李樂詩話古樸味漸失
極地探險家李樂詩早喺上世紀八十年代就去過西藏，佢提醒嚮往原始風光嘅人要趁早去喇，事關連美國連鎖咖啡店都已進駐，古樸原味漸漸走樣。講到點樣影靚相，佢話閉上眼隨便撳快門，包保張張都係靚相喎！事實上，西藏真係好似人間仙境。
卓妮