水機得物無所用 港產官僚太敗家

正常人係唔會嘅，但唔正常嘅人就好難講喇。嗱，康文署就係唔正常嗰個喇！

事情係咁嘅，康文署耗資四十三萬元，幾個月前喺沙田城門河第一及第二海濱花園、安景街公園及沙田公園單車徑，合共安裝八部飲水機。表面睇，咁都算係德政嚟嘅，你知啦，港產官僚做事向來得過且過，馬虎求其，所以香港單車徑一直缺乏飲水機設備，市民踩單車好似喺荒漠咁，口乾舌燥嘅時候永遠難覓一滴甘泉。所以咯喎，家陣康文署應市民要求裝設飲水機，本來應該皆大歡喜至啱，可惜結果啱啱相反，莫講話冇人欣賞，康文署仲直情畀人鬧爆添。

點解？原來康文署為咗方便接駁安裝，居然將飲水機設喺冇雷公咁遠嘅公廁門口，一來市民難以發現，渴死都未搵到水飲；二來咯喎，唔合乎衞生吖嘛，咁同靠害市民有乜分別呀？咁同將屋企個茶壺放喺馬桶隔籬又有乜分別呀？港產官僚做嘢唔經大腦，但求就手，唔理好醜，唔畀人鬧爆至奇啦！

講真，香港地公廁有幾乾淨，大家心照啦，萬一有人帶有病菌，去完廁所又唔洗手，之後直接使用飲水機，到時容乜易成為播毒溫床o架？康文署連呢啲基本衞生常識都冇，簡直係唔衰攞嚟衰。

正如當區區議員話齋，康文署為咗貪方便，求其將飲水機設喺公廁門外，市民睇見都唔敢用，明顯冇考慮用家感受，根本就係敷衍塞責。更離譜嘅係，康文署收到本報質詢後，雖然拿拿臨補鑊，喺單車徑設置告示牌，指示飲水機位置，但用咗只有幾個月嘅飲水機，有啲壞咗都冇人理，康文署任由飲水機封塵，你話係咪豈有此理吖！

唉，水機得物無所用，港產官僚太敗家。正所謂見微知著，講到康文署敗家，事例又點止咁少吖。本報之前踢爆，康文署轄下嘅公眾泳池，明明預留咗三十個餐廳位置，點知僅十間有人經營，其他唔係丟空養老鼠，就係淪為雜物房，就算有人多次求租，康文署都以呢樣嗰樣理由拒絕，好似嫌錢腥咁，簡直不可理喻。

嗱，梁振英政府話要「穩中求變、適度有為」，計功夫茶話齋，依家最需要改變嘅就係官僚作風。一句到尾，唔該康文署醒醒定定，快啲將飲水機維修好，搬去合適位置，唔好再浪費納稅人血汗錢咁敗家喇！