政情：楊立門學唱意法藝術歌
喺港府入面有「高官界歌王」稱譽嘅民政事務局常任秘書長楊立門，尋日出席一個青少年文化活動時大顯身手，高歌《把根留住》一曲，水準媲美職業歌手，令唔少現場觀眾都聽出耳油。聞說呢首歌嘅作詞人之一嘅童安格當年作呢首歌時，係想借歌表達愛國情懷，所以之後首歌亦變成唔少國民教育活動嘅指定曲目之一。楊立門尋日揀呢首歌嚟唱，莫非佢想乘機用呢個方法推廣國民教育？
「一年過了一年，啊一生只為這一天，讓血脈再相連……」唔知佢有無意思搞個高官合唱團呢？雖然楊立門歌藝非凡，但原來佢冇咩點練，佢話依家只會喺啲文化宣傳活動同慈善表演度先唱一、兩首，唱藝術歌反而係佢嘅新興趣，會學一啲用意大利文同法文唱嘅藝術歌喎。有藝術歌根柢，怪唔得唱呢首流行曲都唱得咁有中氣啦。