政情：葉偉明難忘投票最低工資
工聯會勞工界立法會議員葉偉明今屆轉戰新界東直選落敗，他日前接受本報訪問時話，工聯會規定旗下勞工界議員不得連任嘅規定，或者需要檢討係唔係可以連任一次。
回望過去四年嘅立法會生涯，葉偉明最難忘係有份投票通過最低工資法案，感覺就好似睇住自己嘅BB出世。
葉偉明話，可否連任都有好處，估計理事會會檢討：「規定無疑可以畀後生上位機會，但亦有人話應該可以連任一屆。」佢又話，短短四年議會生涯，最難忘係最低工資立法成功，除因為要通宵開會，亦因為佢喺出任議員前已一直關注該議題，有機會投下贊成票，就好似自己個仔出世咁興奮。
葉偉明喺工聯會廿七年，有「工聯之子」之稱，今次意外敗陣，但就強調唔理佢去向係點，工聯會唔會放棄新界東。佢現時忙於搬屋同搬辦公室，雖然前路茫茫，但好肯定可見將來亦唔會離開工聯會：「勞工議題係我興趣，諗唔到唔做工聯會嘅理由。」