民主黨喺今屆立法會選舉輸剩六席，連佢哋嘅年輕黨員都慨嘆白鴿黨已經唔係泛民第一大黨，真係要諗吓計救亡。
其實白鴿黨早前為咗收集市民對佢哋嘅意見，已經搞咗個網上意見調查，點知就疑似畀人惡搞，收返嚟嘅問卷中有成一百份啲資料同答案都一樣，搞到佢哋都唔知點做分析，個調查就咁不了了之。連做個問卷調查都搞成咁，路線改革呢啲咁大工程嘅嘢分分鐘都係得個講字。
白鴿黨早前做咗個網上問卷調查，就白鴿黨喺政改嘅立場，政改嘅結果，個黨係咪要改革等收集市民意見。但有乳鴿同我哋講，雖然收到二千幾份回覆，但「水分」多達四分之一，唔止有人喺問卷上寫粗口，當中更有成一百份個人資料同答案都一模一樣，佢哋都呻收返嚟嘅資料好難分析同發布。
其實唔止網上問卷調查搞到一鑊泡，佢哋尋日搞嘅集思會都係得個吉，個會由朝開到晚，但係黨嘅路線、係咪要改革、領導人改選等咩都未傾，淨係講大家贊成要年輕化、多啲同市民溝通呢啲係人都知嘅嘢。佢哋要洗心革面，都唔知從何洗起。