政情：田二少教吳克儉處理國教
新民黨候任立法會議員田北辰身為時裝連鎖店老闆，講嘢幾時都咁自信。佢前日喺一個酒會上遇到教育局局長吳克儉，就我哋影到嘅相所見，田二少揸住隻杯，對住吳克儉講嘢講到眉飛色舞，而吳局長全程就似小學生咁留心聽書。到底田二少講緊乜，搞到堂堂局長都要唔出聲企埋一邊得個聽字呢？
我哋後來問番田二少同局長傾咗啲咩，二少竟然毫不遲疑咁答：「梗係講國民教育啦！」田二少話，雖然政府早前宣布學校有自主權決定是否開設德育及國民教育科，但近來唔少中產選民向佢反映，話如果政府單方面撤回指引，會令嗰啲諗住開科嘅學校唔知攞乜去教學生，又話個人認為教育局應該為呢啲學校制訂指引。據田二少所講，當時吳克儉都覺得佢所言甚是，話會返去考慮吓佢嘅意見。國教事件剛剛至稍為平息，田二少又建議局長點番起個火頭，局長唔會勇得咁交關啩。