中環出更：王國強上京度中秋困車龍

內地每逢長假，例必塞滿車龍，而今年更恐怖。K.K話，京城市民爭住出外送禮，搞到車龍處處。高速公路更塞到好似停車場。九月二十九日晚上佢趕赴「國宴」期間，更係寸步難行，幸好已提早幾小時出發，否則去到已散席嘞。去首都機場嘅公路都好誇張，由人民大會堂往機場嘅車程，本來只係半粒鐘，但遇上中秋節，竟然嚴重塞車，被困兩粒鐘嘅K.K突然人有三急，尷尬到極。到底最後點「解決」，佢笑而不答，大概係「忍功」了得喇。

江明熙送老人家電視機

好唔容易返到香港，K.K前晚趕往會展出席煙花匯演，風騷地滿場飛敬酒。同場仲有廣東各級政協委員聯誼會首席會長戴德豐、「牛仔褲大王」楊釗、前恒生女大班梁高美懿等。戴德豐千金戴凱欣同名模陳祉妤齊坐VIP席。見到煙花燦爛，各人不停用手機影相，表現雀躍。

四洲集團太子女戴凱欣（左）與名模好友陳祉妤（右）大讚今年煙花有特色。（被訪者提供）

戴德豐捐出五十萬元贊助煙花匯演晚會。

香港醫療專業人士協會創會主席江明熙醫生（Bernard）就與副主席鄭淇德醫生齊來。Bernard早前義賣千八個月餅，成功籌得近三十萬元，諗住買Panasonic電視機送贈老人家。信興集團副主席蒙德揚知道後，推介對方買價錢較實惠嘅JVC 24吋電視，除咗計個批發價，仲承諾對方每買一部電視，佢送出一部血壓計。Bernard話，一百部電視機將於聖誕送出，皆大歡喜。

卓妮