新一屆立法會七十個議席中，有四成、即廿八個新丁議員，連帶立法會大姓亦改朝換代，由原本「李梁劉陳」四個姓氏鼎足而立，變成「梁陳」兩個姓氏抬頭，各有八名議員成為「大戶」，相反姓李同姓劉嘅議員數目就縮水一半至三個，原因係多名資深議員競逐連任失敗，認真時也命也。
上屆立法會有六十名議員，幾乎有近一半議員屬於「李梁劉陳」四個姓氏，其中又姓李嘅獨佔鰲頭，七人包括民建聯李慧琼、勞聯李鳳英等，其次係姓梁，計算經濟動力梁劉柔芬在內共有六點五個人，至於姓劉同姓陳則同時有六人。
不過，經過立法會選舉後，姓氏進行大「洗牌」，「梁陳」兩個姓氏正式抬頭成為「大戶」，前者有民建聯梁志祥、泛民主派梁繼昌加盟，後者則有工聯會陳婉嫻、人民力量陳志全等成為陳氏新血。至於姓李同姓劉就大縮水，後者依家僅餘「新界王」劉皇發、新民黨主席葉劉淑儀及民主黨副主席劉慧卿三人喺議會。