政情：「貪曾」墮落淪地底泥
近年嘅植樹活動林林總總，灣仔區議會早喺十幾年前已大搞綠化計劃，喺區內廣植樹木，仲搵嚟唔少高官名人親臨種植，係威係勢。不過，最近環保組織長春社就發現，位於摩利臣山道、黃泥涌峽行車天橋底行人路上有一棵大樹，原來係由「貪曾」曾蔭權喺二○○○年擔任財政司司長時種落嘅，但由於長期無人理，掛喺樹上嘅貪曾名牌早已「墮落」大樹根部嘅泥土上，變得殘殘舊舊，淪為「地底泥」。
大樹自生自滅
貪曾呢個植樹名牌，係以不銹鋼製造，照計成本都唔平，應該係由灣仔區會出錢訂造，如今已經變成「地底泥」，認真嘥公帑。名牌跌咗落嚟都冇人理，棵大樹就更加係自生自滅，真係夠晒自然。
據講呢棵大樹至今仍未納入古樹名冊，無他嘅，一來貪曾亂港七年忙於貪盡海陸空，仲鬼得閒理自己種棵樹有無納入古樹名冊咩！