政情：鄧國威親解暴瘦之謎
入得官場呢個「熱廚房」，少啲精神同心血都可能難以處理各種新舊問題，倘工作多時突然身體暴瘦，更加可能惹來一陣患病疑雲，講緊嘅係公務員事務局局長鄧國威（Paul），近年來佢由面圓圓變成面形同身形都激瘦，外間對此都有各種揣測，阿Paul尋日同傳媒茶敍時澄清自己其實冇病，暴瘦係因為刻意減肥喎！
阿Paul上任局長後首次拆解自己暴瘦之謎。佢話，自己減肥其實係兩年前開始，主要係感覺人到中年，工作壓力大又運動少，唔想有病先要做運動同減肥，所以最終喺兩年間減咗成廿磅，至於具體減肥之道原來係行路，阿Paul話喺香港行一陣就會出一身汗，所以佢保持每日都行半個鐘，另外就係戒甜嘢喎！
上屆政府接連有高官身體出問題，有前高官因病要提早退休，另有前高官不時出入醫院，搞到有議員當時認為要訂立高官健康申報機制，阿Paul身為十六萬公務員之首以身作則亦屬無可厚非，不過講到尾減肥都係適可而止，身體健康先係最重要。