政情：接掌帳委會大舊石惹爭議
經過建制派初步協調，立法會幾個最重要嘅主席位都已大致確定，其中大會主席預計由民建聯曾鈺成連任；地位等同大會副主席嘅內務委員會主席，九成九由經濟動力梁君彥出任；負責審批政府撥款嘅財務委員會，則係新早餐派嘅吳亮星同民主黨劉慧卿之爭。至於有一定重要性嘅政府帳目委員會，據聞建制派會推薦地產及建造界嘅石禮謙（大舊石）出任主席，但就有議員擔心佢好容易會出現角色同利益衝突，損害帳委會公信力。
議員流失 揀無可揀
之前立法會選舉有多名資深議員棄選同落選，令多個委員會唔見咗大批舊人，其中「重災區」係負責審議政府開位建議嘅人事編制小組委員會，十三名委員輸剩兩個。環境事務委員會亦唔好得好多，十七名委員輸剩六個。至於有七名委員嘅帳委會，原正副主席黃宜弘同陳茂波，一個被迫棄選，一個走咗去做官，另一委員甘乃威亦無角逐連任，只係得番大舊石、民建聯李慧琼、工黨何秀蘭等四名舊委員。
由於帳委會嘅主要職能係公審同譴責啲大花筒高官，為免出現角色衝突，已進身行政會議嘅李慧琼預料會自行退會，令建制派只剩低大舊石一位舊人，喺揀無可揀之下，惟有推薦佢接任帳委會主席。泛民主派方面，新當選嘅會計界議員梁繼昌，更加可能會爭做副主席。
我哋初步問過幾位泛民議員對大舊石出掌帳委會嘅睇法，反應一致負面，批評佢開會一係唔出聲，一出聲就係講埋啲歪理撐政府同撐地產商。加上帳委會係根據一年兩次嘅審計署報告做嘢，當中內容或會涉及政府批地、收地及補地價等問題，由代表地產界嘅大舊石做主席，肯定會經常出現角色同利益衝突。
即使大舊石識得避嫌，肯如實申報利益同避席投票，亦會為帳委會嘅運作帶來諸多不便。如果建制派同大舊石唔肯知難而退，泛民隨時次次開會都同大舊石玩嘢，令帳委會運作癱瘓，甚至公信力盡失。