中環出更：黃達東唔怕遺傳腦退化
下周二就係「世界腦退化症日」，仁愛堂尋日宣布成立「腦伴同行中心」，為患有腦退化症人士及家屬提供支援同培訓服務，預計年底開幕。為善最樂嘅副主席歐雪明（Clarea），捐出七位數字善款支持中心發展，佢前日不慎扭傷右腳，撐住拐杖都要出席見證重要一刻，仲帶埋八十幾歲嘅媽媽同姪女一齊捧場添。「光纖之父」高錕太太黃美芸都有現身支持。
常保持心境開朗
仁愛堂主席黃達東（Dennis）話，佢爺爺都係腦退化症病患者，經常認錯人之餘，有時剛剛食完飯，轉個頭又叫開飯，搞到家人都冇晒符。所以患者最需要嘅，係專業嘅照顧者。Dennis笑言唔擔心個病隔代遺傳，事關佢經常保持心境開朗，每星期會游番兩轉水，健康輕鬆可達到。
