中環出更：王賢詠攝影展家族傾巢捧場
已故「電子大王」兼大慈善家王華湘嘅大孫女王賢詠（Vivian），早前喺上環夏至畫廊舉行《背後及往後（Behind and Beyond）》個人攝影展，並出版首本攝影集，為香港癌症基金籌款。當日王氏族人傾巢而出，包括Vivian爸爸兼王家長子王忠椏、次子兼前東華主席王忠桐、三子王忠梴及老么兼前仁濟醫院主席王忠秣，仲有兩位姑媽王忠椒及王忠恩，王家第二代全員到齊，加埋第三代嘅前東華總理王賢誌及仁濟總理王賢訊（Vincent），場面十分墟冚。
個個追王賢訊攞簽名
Vincent及太太朱穎詩一到場就被親友包圍住，事關佢本取材於風水術數嘅奇情小說《輔命師－火紅年代》，出版後大受歡迎，個個追住佢攞親筆簽名書，仲叫佢幫手揀幅啱屋企風水嘅靚相。那邊廂，主人家Vivian嘅老公Paul、大仔Samson及細女Nicole都有幫手，Vivian為攝影集簽名簽到手軟，皆因親友們大破慳囊買畫、買書，瞓身支持佢做善事。
講起迷上攝影嘅因由，原來係由三個子女出世後，影BB相開始。Vivian話，今年大仔都已廿一歲，但佢愈影愈投入，鍾意周圍旅行去影相。Vivian就對方形嘅物體有情意結，笑稱就算方形嘅垃圾桶都唔放過。當日展示嘅作品不乏古舊嘅建築物、門及窗，其中最受歡迎嘅《香格里拉》，就係透過兩幅古牆窺視山城風光，燦爛嘅陽光、簡潔嘅線條，盡顯人間淨土之美。
卓妮