年紀有番咁上下嘅老香港應該都難以忘記，六七十年代嘅香港經常鬧水荒，時不時都要實施食水管制，最嚴重嘅時候係每四天供水一次，每次四小時咁大把。一制水就慘咯，牙又未必有得刷，涼又未必有得沖，穿完膠花開鑊煮飯餵飽一家大細都成問題。喺呢一個瘋狂嘅制水高峰期，「樓下閂水喉」成為街坊街里嘅日常用語，不過大聲唔代表冇禮貌咁解。
真係估都估唔到，北水南調嘅東江水已經源源不絕賣落嚟嘞，水頭充足到任得敗家仔水務署透過爆水管嘅形式浪費晒，二十一世紀嘅國際大都會居然仲有制水呢家嘢，甚至每四天供水一次都辦唔到，講出嚟嚇鬼死又醜鬼死。
邊度制水害人乾煎咁冇品呀？之唔係東區醫院囉，停止供水已經十九幾日o架喇，搞到病人日日冇涼沖，刷牙洗臉嘅基本個人衞生都無能為力。喂，醫院理論上係最講究衞生嘅地方，動不動都要消毒，摸過乜鬼嘢都要洗手，點可以冇水搞清潔咁寒酸o架？學似電視廣告嘅郭峰話齋，撳過升降機嘅Richard，打完乞嗤嘅華哥，仲有去過廁所嘅小明，雙手睇嚟乾淨，其實暗藏邋遢。照咁講，東區醫院咪人人都做咗傳染病嘅幕後黑手囉！
之所以制水，原因係東區醫院上月二十四日確診一宗退伍軍人症，院方基於斬腳趾避沙蟲嘅特殊需要，隨即截斷兩個病房嘅食水供應。停水期間院方係打算安裝濾水器嘅，可惜吖，唔知係訂貨困難定係手腳緩慢，安裝工程遲遲都未完成。你知啦，酷熱天氣之下冇水沖涼好惡頂o架，一身酸酸餿餿自己都未必頂得順自己啦。所以咯喎，其中一名男病人乾煎四日終於忍無可忍，自費購入濕紙巾抹身。呢一位抹身代替沖涼嘅病人批評，院方嚴重影響個人及病房衞生，又冇清楚交代停水原因，病人知情權慘遭剝奪。
唉，其實計功夫茶話齋，東區醫院嘅腦殘負責人死蠢啫，退伍軍人症惡菌冇錯係要防範，安裝濾水器亦係無可厚非，之但係既然安裝效率慢過龜爬，折衷辦法係購買樽裝水畀病人使用，咁咪一天都光晒囉，冇必要令到病人一個二個焗住做污糟貓吖嘛。萬一防到退伍軍人症惡菌，反而防唔到由於污糟邋遢而來嘅病毒，得不償失到非常之咁戇居啫，吓話？
講開又講，添馬艦新政府總部嘅退伍軍人症惡菌搞掂未？希望唔係又制水冇得洗手啦，如果大官小吏竟然成為傳染病幕後黑手，中招病人啱啱遇着剛剛送去東區醫院，然後又因為冇得洗手而人傳人，咁嘅情況將會進一步嚇鬼死又醜鬼死o架！