手機附救命鐘 關顧長者

「關愛老友記手機及月費捐贈計劃」自二○一○年起舉辦，期間共送出一百部手機。去年免費手機月費計劃有效期屆滿前夕，和記電訊更主動延長一年免費服務。轉眼間一年已過，該公司今年繼續向長者送上好消息，除將免費服務再延長一年外，今年更額外送贈五十部手機連一年免費服務，令一眾長者喜出望外！

「開心到好似中獎」

新世代的手機不僅是通訊工具，更可能隨時充當「救命鐘」！七十七歲的黃寶珠患有心臟病及高血壓，僅靠綜援生活，囿於經濟，一直只能使用二手的舊款手機，「部手機早排仲壞埋，點知你哋就送呢部新手機畀我，部手機仲有個緊急掣，有起事上嚟就可以叫人幫手，真係多謝晒！」八十一歲的董旺亦坦言對獲贈人生第一部手機令他喜出望外，「我成日都聽收音機，呢部手機有埋收音機功能，可以一物兩用，真好！」

香港和記電訊與東方日報慈善基金合辦「關愛老友記手機及月費捐贈計劃」，受惠長者大感欣喜。

和記電訊職員細心地向長者講解手機功能。

「有人送部新手機畀我哋，真係開心到好似中獎咁！」八十二歲的梁昭汶與比他年輕六歲的妻子李順金一直共用一部手機，惟自從去年手機被人偷去後，夫婦便活在沒有手機的生活中。「呢部手機啲掣夠晒大粒，啱晒我哋啲老人家用，以後我哋兩公婆就可以多啲打電話畀仔女，唔同住都可以傾吓偈！」梁太笑逐顏開地說。

「最緊要啲長者用得開心同覺得方便，我哋會繼續物色適合嘅手機畀長者用！」和記電訊企業傳訊部總經理吳美玉表示，該公司已預留資源，希望可長期持續推行有關計劃，讓更多長者受惠。

深水埗街坊福利會陳昆棟老人康樂中心為受惠機構之一，中心主任黃美娟指區內人口老化，且多來自基層家庭，長者對贈送手機計劃反應熱烈，「好多謝有呢個計劃，對長者嚟講真係一份實際有用又體貼嘅禮物！」

記者：徐少琴、何穎賢

攝影：霍振鋒