一班立法會參選人經過選舉爭位後，一當選議員又靜雞雞展開另一場爭位戰，今次輪到爭奪議員辦公室。立法會大樓每層只得十五間房，所以唔少政黨都已經諗計，撇甩唔想見到嘅眼冤政黨自成一閣。當中民主黨（白鴿黨）同人民力量成為最討厭嘅政黨，幾乎冇一個黨派想喺佢哋隔籬工作。成班議員因為辦公室咁小事，就變晒做小學雞，睇嚟泛民選舉後話要團結都係得個講字。
泛民因為選舉冇協調而大敗，估唔到去到揀辦公室都係冇協調，一味顧住自己。今屆新增至四席嘅工黨，由於唔係好想同人民力量喺同一層，所以就諗到條絕橋，就係聯同白鴿黨、民協馮檢基、街工梁耀忠、衞生服務界李國麟、新民主同盟范國威同社民連「長毛」梁國雄坐埋同一層，咁就啱啱好十五人，唔使同其他人逼。但范國威同白鴿黨有牙齒印，肯唔肯坐埋同層都未知。
建制派亦係拗餐死，好似工聯會同民建聯都增加議席，唔能夠坐埋同一層，料民建聯會同三散人夾埋，但三散人之一嘅保險界陳健波又話可以嘅話唔想搬辦公室，所以又未必成事。咁人民力量點算呢？預料唔少新當選嘅單丁建制派會同佢哋同層，唔知會否擦出火花呢？