政情：林鄭饑饉8小時助籌款
一班師生及家長馬拉松式絕食反對國民教育科後，尋日政務司司長林鄭月娥亦公開話要「絕食」八個鐘！大家唔好誤會，林鄭並非反國教，而係響應一班公公婆婆「饑饉八小時」籌款活動，幫內地貧困學生起校舍及宿舍。
香港世界宣明會尋日舉行「耆英饑饉八小時」活動，有一千五百個長者參加，林鄭原本只係做活動主禮兼監誓，但見到老人家肯捱餓籌款咁有意義，於是即場宣布加入「絕食」行列，唔食嘢八小時，仲稱呼公公婆婆為「哥哥」、「姐姐」，冧到班長者不知幾開心。
事實上呢班老人家又真係幾勁，為咗幫江西一間學校起新校舍，目標要籌一百八十萬元，活動中最大年紀嘅李潔貞有九十六歲，饑饉經驗超過十年，自稱平時餐餐食好少，所以饑饉冇難度喎。李婆婆又話，自細輟學好慘，搵工好艱難，希望下一代讀多啲書，所以佢落力籌錢幫內地嘅窮學生。