政情：街坊16字真言 幫劉江華打氣
民建聯老將劉江華飲恨超級區議會議席，打回原形變番單料沙田區議員，無論黨內或黨外支持者陣營都哀鴻遍野。據聞有多個街坊支持者為佢落選而喊，搞到相當悲情，反而要劉江華掉轉頭安慰番佢哋。日前民建聯開會，有街坊支持者就委託觀塘區議員洪錦鉉將一幅十六字真言送畀劉江華，以表示可惜之餘，更為佢打氣。
街坊支持者向劉江華送贈嘅十六字真言為「一將易得，眾將難求；眾將易得，主將難求」，即係話主將難求，但民建聯就偏偏失落一位主將，感到可惜之餘，亦有鼓勵劉江華之意。不過，古語亦有講法係「千軍易得，一將難求」，所以十六字真言係咪有關街坊重新演繹過就唔知喇。
講開劉江華，據聞佢前日獨個兒由沙田馬鞍山帝琴灣凱弦居寓所坐邨巴外出，再轉港鐵馬鞍山線及東鐵線出中環，而我哋尋日下午亦喺中環一間酒店見佢出現過，但好快就上咗酒店，然後不見蹤影，唔知約會乜嘢重要人物傾密偈呢？