政情：民記邀發叔大和解
緊張刺激、波譎雲詭嘅立法會選舉曲終人散，但就留低唔少火頭。好似成為選舉大贏家嘅民建聯（民記），派出嘅九張名單全部當選，雖然看似順風順水，但卻存在隱憂，其中新界東、西都有唔少鄉民堅持拒絕支持民記。為咗修補關係，據聞民記已經伸出友誼之手，該黨五位新界區嘅立法會議員將會同鄉議局主席劉皇發共組「新界事務工作小組」，聲言將會喺未來四年，凡事有商量咁話。
民記喺新界西贏到三個議席，新界東亦兩席全勝，成績咁好，就連民記中人都暗呼幸運，因為新界西最後一個勝出嘅新界社團聯會會長梁志祥，贏白鴿黨對手唔夠一千票，絕對係險過剃頭。之所以會搞到咁，同元朗其中四個鄉事委員會堅決唔肯支持民記有關，呢度數埋數埋，最少都冇咗幾千票。
未來四年 有商有量
據講民記都睇到問題嘅嚴重性，擔心下次唔會再有咁好彩，加上選票唔會有人嫌多，為咗同鄉紳修補關係，民記原來早就決定釋出善意，十月立法會新會期開始時，會成立一個新界事務工作小組，最初原訂成員包括發叔、為成立小組穿針引線嘅鄉議局副主席張學明、民記主席譚耀宗及意外落選超級區議會嘅劉江華。
以往鄉事派喺立法會除咗發叔外，總會有多個鄉事背景嘅議員，但嚟緊新一屆只係得番發叔一個孤伶伶，民記呢個決定，除咗可以修補關係外，對鄉議局嚟講亦絕對係一家便宜兩家着，講到底，多幾個盟友唔使等發叔一個單打獨鬥。至於譚耀宗以外嘅四位民記新界區立法會議員，據講亦會參加小組，凡有關新界事務嘅議題，都會事先協調，總之就同發叔有商有量啦。
傳鄉紳轉投票泛民
民記向鄉事派示好，算係踏出關係正常化第一步，但要修補同鄉事派關係，相信仲有一段漫漫長路。有消息話，元朗有唔少鄉紳喺投票當日，投咗畀其中一位超級區議會泛民主派候選人，走失咗可能成萬票咁多，絕對係劉江華落選其中一個因素，如果真係咁，睇怕呢個新工作小組嘅任務相當艱巨。