中環出更：青聯廿年會慶 CY見證成長
香港青年聯會尋晚舉行第二十屆會慶及會董就職典禮，向來出名團結嘅青聯兄弟姊妹，夾手夾腳搞起成個活動，特別請來特首梁振英（CY）主禮。CY致詞時話，青聯創會當日佢都有出席，見證青聯成長，笑稱自己都成長咗二十年，不過好彩係佢同港區全國人大代表霍震寰嘅年齡差距冇變到喎。CY講完就急急腳離開，原來佢要趕去跑馬地馬場，約好班「梁粉」撐枱腳，佢強調大家係風花雪月。
青聯主席葉振都全晚出出入入會場招呼賓客，分身不暇，其他兄弟都一樣唔得閒，好似常務副主席霍啟剛咁，佢前晚忙到三點都未收工，秘書長郭永亮就攞住個對講機，由入場忙到散場，會董鄭詩韻仲忙到三日都無食過正餐。啟剛入咗會八年，識落嘅老友都話幫佢籌備婚禮，但佢話有啲婚禮細節想保持神秘，都係自己搞番好啲，總之籌備婚禮零壓力。至於生仔呢啲大事，佢就話未得閒諗住，總之要搞掂埋個晚會先至算。
黃定光同場慶牛一
除咗啟剛之外，霍家其他成員都係青聯之友，繼港區全國人大代表霍震寰係創會主席，弟弟霍震宇又做過副主席，之後就到啟剛、啟山兩兄弟，依家連堂妹霍思緯同堂弟霍啟文都加入。霍震宇話，當年成班年輕人一齊玩得好開心。至於啱啱入咗會半年嘅啟文，依家積極參與，唔知會唔會搵爸爸霍震寰做目標呢？
至於副主席朱鼎健（Ken），最難忘嘅事係「青聯招工日」，集團旗下有部分員工都係由青聯招聘。阿Ken原來仲係青聯媒人，因為近百個會員都係由佢推薦入會。卓妮同場仲遇到青聯創辦人之一、立法會議員黃定光，原來當晚係佢六十三歲牛一，佢話屋企個「行政長官」出咗門，仲以為生日要孤苦伶仃，冇諗過依家賓虛咁嘅陣容，仲話最開心嘅事，係喺青聯搵到佢嘅另一半喎。
卓妮