政情：利孝和夫人傳入院做大手術
前電視廣播非執董利孝和夫人利陸雁群向來活躍於社交界，但最近就好似少咗出席公開場合，最近一次見佢係今個月銅鑼灣希慎廣場開幕典禮。聽聞曾經同佢通過電話嘅朋友透露，話利孝和夫人最近好似連講電話把聲都陰聲細氣咗，我哋近日就聽聞利孝和夫人疑似心臟出現問題，已經預約咗下月九日喺養和醫院做大手術，如果係真嘅話，好可能呢兩日就要入院做準備喇。
利孝和夫人自二月退出電視廣播後，一直養尊處優，呢排更加少喺社交場合出現，據聞連佢嘅女婿雷禮權上星期二搞嘅生日派對，佢都冇去到。利孝和夫人之前因為肺炎入過院，聽聞其大潭水塘道屋企最近都請多咗醫護人員照顧佢。近日我哋仲收到風，話佢下個月會做個大手術，至於係咩手術就唔知喇，不過佢個心臟有啲問題，仲裝咗心臟起搏器，但做乜嘢手術都好，希望佢快啲痊愈啦。
利孝和夫人喺一九六○年代同邵逸夫等人投得香港免費電視牌照，並於一九六七年正式啟播，由最大股東利孝和為主席，邵逸夫就任常務董事。雖然至今利家及邵逸夫均已退出，但相信佢哋會成為港人喺電視史上嘅集體回憶。