政情：「偽民主鬥士」黃成智訪國家機關
民主黨（白鴿黨）經常批評西環干預本港事務，又成日口口聲聲投訴自己啲黨員冇回鄉證返大陸，但該黨黨員黃成智就被指原來一早已經投共。有不值白鴿黨成日講一套、做一套嘅市民報料，話本身係基督徒嘅黃成智早喺○八年曾遠赴北京同內地愛國教會北京基督教三自會成員會面，仲拜會埋國務院宗教局添。嗰位市民睇唔過眼，批評黃成智投共，係「偽基督徒」同「偽民主鬥士」，仲話佢「根本就係欺騙世人」。
我哋喺黃成智嘅官方網站發現兩張分別係黃成智拜會國務院宗教局，以及同北京基督教三自會成員會面嘅相片。根據網站按日期羅列活動照片嘅方式，顯示黃成智係○八年四月上京嘅。
據了解，北京基督教三自會又叫做「北京市基督教三自愛國運動委員會」，被視為愛國教會，係受國務院宗教事務局監管嘅，所以黃成智上京獲國家機關接見，真係非比尋常。我哋聯絡過黃成智，但佢未有回覆。
新界東候選名單仲有陳克勤、葛珮帆、梁安琪、龐愛蘭、方國珊、張超雄、田北俊、葉偉明、陳志全、蔡耀昌、范國威、劉慧卿、何民傑、湯家驊、陳國強、龐一鳴、梁國雄、邱榮光。