爆管滲水 房署敷衍阿婆
藍田平田邨有住戶早於今年年初已發現上層單位水管爆裂，即向房屋署反映，懷疑職員敷衍了事，單位其後出現滲水，職員仍僅以「目測」判斷，最終單位牆身發霉地板亦有水浸。房署接獲轉介後始承認滲水與上層單位水管爆裂有關，卻否認早已獲悉問題。學者與關注團體皆斥房署處事態度散漫，未能及時處理導致問題惡化。
居於平美樓的林婆婆指出，今年一月發現上層單位水管爆裂，污水經外牆不斷流入廁所抽氣扇口，遂即時向房署反映，「佢哋叫咗個管理公司嘅人上嚟望兩下，就話嗰啲係食水，冇咩影響，影幾張相就話唔再跟進！」惟未幾林婆婆卻發現房間地板有滲水情況，並迅速伸延至廁所及廚房門口，更有蔓延全屋迹象。
聘師傅重驗 證禍源樓上
「之後再叫房署上嚟查滲水源頭，點知佢哋就咁用對眼『檢查』完，就一口咬定唔係樓上爆水喉，仲話只要我拆咗洗手盆，再拆埋入牆嘅浴室層架就冇事！」不過，林婆婆其後自行聘請師傅再度檢查，對方卻指滲水源於上層單位水管爆裂，房署得悉後始安排職員維修外牆水喉，「搞咗幾個月先嚟補飛，已經太遲啦，依家一屋浸晒邊個負責？」
房署發言人承認，經檢查後證實林婆婆單位牆身滲水與上層外牆食水喉滲漏有關，並指早已知悉有關滲漏並安排跟進。然而，發言人仍堅稱早前才接獲林婆婆單位內牆身滲水的投訴，而非今年一月，接獲投訴後曾四度上門檢查，發現住戶浴室內曾安裝數個層架，認為乃導致牆身滲水的另一原因。不過，發言人對調查期間被指單靠「目測」判斷，未有作出專業檢驗一事則未有回應。
直斥署方「擘大眼講大話」
「好明顯係擘大眼講大話！今年一月我個女大住個肚嗰陣叫房署啲人上嚟檢查，一定唔會記錯！」林婆婆直指房署的回應與事實大有出入，矢言將追究到底。
香港專業教育學院（青衣）建造工程系系主任陳子明指出，地板滲水需從多方面檢查源頭，認為房署做法有武斷之嫌，「就算真係覺得滲水同浴室裝咗層架有關，都應該再有進一步測試，只係靠目測就斷定滲水源頭，好明顯唔夠專業！」
「房署職員如果一開始肯花多啲時間同耐性處理水管爆裂，住戶就唔使無辜受滲水困擾！」公屋聯會主席王坤直指事件反映房署處事態度散漫兼「唔上心」，加上經驗不足，認為房署需就事件負上責任，為單位進行修補工作。
記者：伍思明