人類係一種有必要瞓覺嘅動物，唔瞓覺唔得造成好多極之頭痛嘅問題，因為你需要空間擺低一張床，除非你唔介意瞓街或者天橋底。偏偏香港係一個冇乜空間擺低一張床嘅國際都會，所以居住問題不斷困擾蝸居一族，包括大學生。
大學生好多都想入住宿舍，既方便返學，亦嘗試過非正式離家出走嘅自由日子，不過可惜吖，大學宿舍持續短缺，情況只係好過骨灰龕位少少。中文大學原定興建五間新書院，分別係晨興書院、善衡書院、和聲書院、敬文書院以及伍宜孫書院，總共提供二千四百個宿位。弊就弊在至少兩間書院要等到明年中至年底先至有望落成，僧多粥少嘅住宿問題點解決呢？冇理由叫大學生住劏房或者籠屋啫。
哈，中大不愧為學術殿堂喎，佢哋以學富五車嘅無窮智慧度咗一條奇謀妙計，姑且叫做「皇恩浩瀚准屈蛇」，崇基書院、新亞書院同逸夫書院推出臨時宿位計劃。具體辦法係咁嘅，二人房入住三人，三人房入住四人，總之每間房掟多一個人入去擺低一張床瞓覺，咁就無中生有額外增加三百四十個宿位。當然啦，攞正牌屈蛇少不免變成摩肩接踵擠迫戶，所以每名宿生獲減兩成宿費作為補償。
臨時徙置……唔係……臨時宿位計劃帶出另一個問題，又話要發展教育產業，又話要將香港打造成區域教育樞紐，學生哥連瞓都冇地方瞓，大學宿位爭崩頭，教乜育乜產乜業呀？
發展教育產業呢一個春秋大夢，係過氣特首曾蔭權喺○九年提出嘅，當時仲未被東方報業集團獨家揭發貪遍海陸空嘅煲呔曾發表施政報告，內容如此：「發展教育產業的目標是鞏固香港的區域教育樞紐地位，提升香港的競爭力，配合國家的未來發展。我們較早前公布的四幅全新土地，已分配給四個辦學團體興建國際學校。」
人一走，茶就涼，發展教育產業會唔會因為貪曾落台而亂大謀㗎？睇怕情況不容樂觀，一來成個計劃影都未見，有機會又變成「不提等於不存在」，二來咯喎，分配畀辦學團體嘅土地位於愈來愈受爭議嘅新界東北發展區，不排除胎死腹中嘅可能。最近有一班人組成「反對香港被規劃行動組」，矛頭直指新界東北發展區，認為區內大興土木會吸引內地富豪來港買樓，從而導致深圳香港一體化，擔心一國兩制提早玩完，所以建議擱置成個計劃。假如反對聲音成功推翻新界東北發展區，教育產業將會淪為另一個乜乜中心物物港嘅假大空工程。
計功夫茶話齋，麻煩梁朝政府周詳部署，唔好搞到教育產業爛尾再一次令香港蒙羞！