如今三十蚊在快餐店食唔到一碟「厚切餐肉煎蛋飯」，然而，世事無絕對，只有真情趣，若然閣下係新界西及六十歲或以上長者，咁呢三十蚊即刻膨脹成大笨象！
呢呢呢，位於新界西選區以民主黨立法會議員辦事處名義協辦嘅長者茶敍，十道菜加「幸運大抽獎」都係三十蚊咋，讓長者「又食又拎」，如此敬老，大手筆過政府推出嘅長者兩蚊坐巴士周圍貢！
民主黨向來最鍾意佔據道德高地，話最睇唔起啲「蛇齋餅糉」，該黨政客日前接受電視訪問時才揚言：「一個月派一包米，每個月搞茶敍，本身要五十蚊先食到嘅就用二十蚊都食到，同賄選無分別，我哋唔做嘅！」
呢頭「唔做」，嗰頭來個「十道菜加大抽獎」三十皮，唔通咁嘅講一套做一套都可以係「去其偏頗，得其神明」，有口話人冇口話自己嘅「明哲之士」？人哋「蛇齋餅糉」就係籠絡選民，自己「十道菜加大抽獎」三十皮就全無機心，純粹幫老人家抗通脹，單單為了敬老？
在三十蚊食唔到一碟「厚切餐肉煎蛋飯」的年代，信民主大笨象得美食兼大抽獎，毋須洗腦，老朽無言感激、信到兩腳一伸喇！
之不過，扮清高，通常都會被人拆穿西洋鏡，即使無心，甚且冇好結果。又舉個例：一七五五年，清‧內閣學士胡中藻所著《堅磨生詩鈔》有句「一把心腸論濁清」，乾隆認為他故意把「濁」字加在「清」字上，居心叵測，處斬。強扮出污泥不染者要小心！