距離立法會選舉投票日仲有三星期，工聯會已經有多人大打告急牌，其中一個係出戰新界東嘅葉偉明。佢尋日同傳媒見面時，好肉緊大嗌選情告急，又話自己嘅民調支持度一般，仲爭幾個百分點至夠票入局，有街坊就彈條好橋畀佢，就係多啲叫陳婉嫻（嫻姐）落新界東拉票。港島同九龍東叫嫻姐幫手吸票，新界東又係咁，莫非大家當嫻姐唔使參選嘅？
話時話，建制派最叻配票，如果唔夠票，點解唔叫其他建制派「配票」畀佢呢？點知葉偉明斬釘截鐵話一定唔搞配票，仲話工聯會嘅支持者唔似軍隊，唔係落柯打做乜就做乜，似乎有言外之音喎。
其實葉偉明又唔使擔心咁多嘅，事關工聯會喺新界東有數以萬計會員鐵票，呢啲鐵票向來都甚少反映喺民調上，咁快就要打告急牌，莫非有其他作用？
新界東候選名單仲有張超雄、田北俊、陳志全、蔡耀昌、黃成智、范國威、劉慧卿、何民傑、湯家驊、陳克勤、葛珮帆、梁安琪、龐愛蘭、方國珊、陳國強、龐一鳴、梁國雄、邱榮光。