保釣成員成功登陸釣魚島插旗宣示主權後，感到無限光榮，但成員之一嘅「阿牛」曾健成就慨嘆，依家最年輕嘅保釣成員都年近五十歲，所以呼籲更多年輕人加入，為保釣增添生力軍。阿牛仲落力推銷話，喺出發去釣魚島沿途會有藍天碧海，又有海豚、海鷗同飛魚陪伴左右，去到釣魚島被日本艦艇人員拘捕時仲見到兩道彩虹出現添。不過，阿牛冇講到參加保釣要捱得餓，仲要經得起風浪同堅持信念至得。
